Der STRANDLOOPER bringt in regelmäßigen Abständen
plattdeutsche Beiträge, um unsere alte Sprache lebendig
zu erhalten. Haben Sie Schwierigkeiten mit dem Überset-
zen? Dann bitten Sie doch einfach einen Insulaner um Hilfe.
KURKONZERT
Unner een wieden Baldachin seeten se un weeren an't
Strieken un Fleiten, Blasen um Trummeln,dat' man so'n
Oart harr: ick meen de Damen un Heeren van't
Kurorchester. Un elker Bad, wat'n bäten up sück holt, hett
vandaag ja sowat.
Up een lütt Podest stunn de Baas, de Dirigent, wiethen to
sehn, wenn he uns ok de meeste Tied sien breede Rürg wie-
sen dee. He weer düchdig an't Hampeln un Herum-fuchteln.
Van all Arbeit smeet sein Jack rein Krüsen. Anners aber
weer't man so'n hennigen Keerl, nett so dünn un mager, as
sein gäle Taktstock, de he as'n Maschin up un daal wüppen
leet.
De Muskanten aber deen so, als wullen se nix mit hum to
doon hebben, denn se keeken mestieds up de Noten, stuv
vör hör. Blot wenn dor een mal neet de rechte Ton to pak-
ken kreeg – dat kunn ja mal vörkamen – sußde de
Dirigentenstock miteens andaal, as wull he de Instrumenten
wär to Räson brengen. Dat hulp denn ok'n good Sett.
An't Enn van so'n Stück aber geev't keen Utbräken mehr,
mit Tusch un Trummelwirbel keemen de Muskanten all wär
up een Brett. Wat ja ok keen Wunner weer, denn bi de mee-
ste Konzert-Stücken weer dat doch Mood, erst mal'n lan-
gen Anloop to nähmen, denn oftobräken, noch mal to star-
ten, denn aber mit Täterä un Dschingbumm een Enn to set-
ten.
So klung't tominst in mien Ohren, de, dat gäv ick to, van
sückse Musik nich alltovöl verstaan. Man dat steiht up een
anner Brett!
So kummt't ok, dat ick wat mehr up dat kiek, wat drumto
geböhrt. Ok dat is woll bewennt!
Anners, hören mach ick disse Musik woll: de Walzers un
Overtüren, de Polkas un Märsche. Is ja keen Mozart un
Haydn, man hett d' doch dicht bi lägen un schillert alltied
wär so'n bäten dör. Bi Kurmusik sall man sück ok ja ent-
spannen un neet so genau henhören.
Ick finn, dat is so recht wat för't Hart. - Ja, de Kurmusik is
doch een groot Vergnögen, un wenn babento noch de Sünn
schient, is'd dübbeld good.
